SATRIYA
JAWA
Assalamu ‘alaikum Wr. Wb.
Pakurmatan
konjuk dhumateng para kadang kakung putri, mliginipun dewan juri ingkang tansah
winengku karaharjan.
Para kadang ingkang sinuba
panakrami.....
Kinarya murwakani
jangkepin atur, sumangga kula dherekaken ngunjokaken panuwun dhumateng gusti
ingkang murbeng dumadi, ingkang datan kendhat tansah paring lumintuning
kanugrahan tumanduk dhumateng kula lan panjenengan sedaya.
Salajengipun,
keparengna kula ngaturaken sekar Mijil setunggal pada, sinaosa naming mrica
kecut sauni – uninipun.
“ Poma kaki padha dipun eling /
Ing pitutur ingong / Sira uga satriya arane / Kudu anteng jatmika ing budi /
Ruruh sarwa wasis / Samubarangipun” //
Para kadang ingkang satuhu
winantu karaharjan,
Adhedasar
cakepan Mijil ingkang sampun kula aturaken kala wau, jebul tiyang ingkang
sinung pangkat satriya menika, sinampiran jejibahan. Ingkang sepisan, kedah
anteng jatmika budinipun. Kaping kaleh, kedah ruruh. Kaping tiga, kedah wasis
ing samubarang.
Ing bausastra,
tembung “satriya” menika tegesipun ‘tiyang luhur’. Tembung “anteng” menika
tegesipun ‘mboten kekathahen polah’. Tembung “jatmika” menika tegesipun ‘tindak
tanduk ingkang nuhoni tata trapsila’. Tembung “ruruh” menika tegesipun ‘sareh’
; ‘alon’ ; utawi ‘praen ingkang katinggal tumungkul’. Tembung “wasis” menika
tegesipun ‘pinter’. Dene, tembung “prawira” menika tegesipun ‘kendel’.
Para kadang sumitra,
Kanthi mbundheli
andharan sekawit, estunipun, nggayuh drajad satriya menika gampil. Saratipun
mboten awrat. Sauger anteng jatmika, ruruh, wasis, lan prawira, sampun ingaran
satriya. Nanging, menapa inggih anteng jatmika menika tegesipun namung mlaha ora
kakehan polah mekaten mawon? Menapa inggih ruruh menika cekap dipun tegesi ulat
sing tumungkul mekaten kewala? Menapa inggih wasis menika cekap dipun tegesi
bakune pinter? Menapa inggihprawira menika cekap dipun tegesi watone kendel?
Para kadang,
Anteng jatmika
kacetha werdinipun tindak tanduk ingkang nuhoni tata trapsila. Simbah asring
ngendika, “Sing sapa nandur bakale ngunduh, Sing sapa utang bakale nyaur, sing
sapa becik bakale ketitik, sing sapa ala bakale ketara, sing sapa cidro bakale
cilaka, sing sapa tekun bakale tekan”.
Kanthi dhasar
menika sok sintena ingkang kepengin nggayuh kabecikan inggih kedah mawi sarana
pakarti ngatos – atos ing pasrawungan kanthi tata kramanipun basal an tumindak.
Lajeng,
kados pundi jlentrehipun pakarti ruruh? Ruruh menika kacetha nunggal teges
kaliyan sareh. Nah, kosok wangsulipun sareh menika kemrungsung ngangsa – angsa.
Dugi ing ngriki kedahipun kula lan panjenengan lajeng kemutan dhateng wekasipun
simbah ingkang jlentrehanipun, “Alon – alon waton kelakon”. Kenging menapa
kedah alon – alon? Sebab, kebat asring kliwat, ngangsa – angsa dadi brahala.
Inggih jalaran
kasunyatan ingkang, mekaten kala wau, pramila ruruh menika mboten sanes inggih
sarehing manah ingkang tansah ngugemi eling lan waspada. Pakartinipun inggih
ngatos – atos ing tumindhak kanthi nyuuda pepinginan. Sebab inggih maneka warna
pepinginan menika ingkkang saestu njalari manah mboten sumeleh, ucap galap
gangsul, lan tumindhak ingkang sarwi kemrungsung.
Dene salajengipun
inggih wedaripun wasis. Smbah nate ngendika, tiyang ingkang sarjana utawi
pinter badhe dados durjana menawi mboten sinung watak sujana utawa wicaksana. Sujana
menika saestu badhe migunani tumraping liyan sinaosa sanes golonganipun
sarjana.
Tiyang dhusun
ingkang kuthung ing kawruh bangunan, nanging idhep dhateng tangga – tepalih,
badhe langkung migunani tinimbang sarjana teknik sipil inkang individualis. Cekakipun
wasis menika inggih pakarti ingkang remen mbantu asanes jumbuh kaliyan
kasagedanipun.
Dene ingkan
pungkasan, kados menapa caranipun negesi prawira? Prasaja kemawon. Ing jaman
samangke kathah tiyang kendel padudon, kendel nglepataken kanca. Nangin sinten
ingkang kendel legawa ndhadha kalepatanipun piyambak? Kamangka simbah asring
meling, “Aja seneng tudhang – tudhing, nanging gelema noleh githokmu dhewe!”.
Cekap semanten
atur kula, cacading basa, kiranging trapsila, kula nyuwun pangaksama. Kupat diduduhi
santen, menawi lepat nyuwun pangapunten.
Nuwun
Wassalamu’alaikum Wr. Wb.
Tidak ada komentar:
Posting Komentar